Улады Латвіі з сённяшняга дня забаранілі ўезд у краіну зарэгістраваных у Беларусі аўтамабіляў. Такія меры ўводзяцца ў адпаведнасці з санкцыямі Еўрасаюза. Падобныя рашэнні былі ўведзеныя таксама іншымі членскімі дзяржавамі ЕС.
Святлана Ціханоўская звярнула ўвагу на тое, што абмежаванні не закрануць пасажырскага транспартнага руху – аўтобусаў, маршрутных таксі і г.д. Акрамя таго, беларусы, якія жывуць у краінах Еўрасаюзу, атрымаюць магчымасць перарэгістраваць свае аўтамабілі на еўрапейскія нумары.
«Абмежаванні на ўезд беларускіх аўтамабіляў – паспешлівае і шкоднае рашэнне. У першую чаргу яно б’е па людзях, а не па рэжыме Лукашэнкі. Таму ідзе актыўная праца над тым, каб дамагчыся змены гэтага рашэння. Мы на сувязі з Польшчай, Літвой і Латвіяй – і даводзім неабходнасць зрабіць выключэнні для беларусаў, якія заязджаюць у ЕС на сваіх аўтамабілях», – заявіла Святлана Ціханоўская.
Таксама яна падкрэсліла, што мяжа з Еўрапейскім Саюзам павінна быць адкрытай для беларусаў, якія не падтрымліваюць рэжым і бачаць будучыню сваёй краіны ў Еўропе.
Раней Польшча абмежавала ўезд аўтамабіляў з беларускай рэгістрацыяй. Яны змогуць перасякаць мяжу толькі ў прысутнасці іх уладальніка. Абмежаванне ўведзенае ў сувязі з рэалізацыяй санкцый ЕС.
вс
